Qene Drehu me itre ewekë ka fetra qa kuhu hnagejë.

Bozu së eni ketre nekönatr ka co a pane amamane la ipië me xou qemekei nyipunie ka troa e la itre xa mekun hnei eni na pi troa ce fe me nyipunie ngöne la aqane qene drehu enehila me itre ewekë ka fetra qa kuhu hnagejë.

Ngöne la pan ejehilai, kahape ame enehila hna majemin troa qene wiwi hnene la itre kem me thin kowe la itre nekönatr, pine laka angatre jë mekun kahape ame la qene drehu tre ka tha nyipi ewekë kö kowe la melene la itre neköi i angatr. Ngo eni a pi troa ce thawa me nyipunie la nenge na mekun jën la aqane mekun cili. Nyipici kahape ame enehila tre easë hë ngöne la ketre hneijin. Ngo loipe tro easë a mekun kahape ame la wan hnei easë, ka fetra qa ka ? Easë itre nekoi ka wetrewetr maine itre xan ju pena. Eni a qaja lai pine laka ame enehila tru catr hnei nekönatr kaco ka thatre la aqane qene drehu, maine tro së a trotrohnin hnyawan la mekun hnei eni na pi ce troa thawa me nyipunie, tre, maine tro së palahi a qene wiwi, tre ame ngöne la ketre ijine tro la qene lapa së a paatr.

Maine tro së tro enehila e Drehu, xalaithe hi la itre ka qene drehu nyiawa, tre, kolo itre qatr me qatre föe nge ame pë lo xan tre loi macaju kö lo ka qene papale. Nyipi ewekë catr tro së a melën la qene zi së me thawa koe la itre nekö së la itre aqane mele së hnei itre xötrëpane së na anith koi së. Ame la qene drehu maine tro së trotronin nyawan, tre kola qaja kahape atre dreng me atre huliwan la na qaja. Loi tro së a mekun kahape ame la tregewekë cili nyine xup la nöj. Kola hape dreng la itre trengewekë ka loi troa xup la melene la atre memine la nöj me ce huliwan me kuca la na qaja hnei ka atre matre tingeting la mele së.

Ame la ketre, tre, tha tru macakö la itre ka atre la ejene itre öni ka sesë, itre öni ka wewe me nyap me itre öni ne hnagejë. Maine tro së dreng la itre nekonatr a ithanada, tre, tro së dreng la angatr a hën la itre öni ka sesë kahape waco. Thatre hë agatr kahape ame la itre waco cili tre hetre ejei angatr tune la ziaxetë, fitiku, waco madra, madrahe, xat, halo maine eniana nge ame pëhë lo itre öni ne hnagejë hnei angatr na hën kahape i, thatre hë angatr la ejene la itre i, maine pena angatr a hën la qene wiwi ne la itre öni cili. Thatrhë angatr kahape ame lo carang qene drehu tre ipeze, ame la wiwa tre wenexetre maine itre xan ju pena. Eni a qaja lai pine laka easë atrun la xa qene lapa ngo thatrehë së kahape ame la easë qene wiwi maine qene papalé kowe la itre nekönatr ka co, tre, easë fe lai a humuth la qene lapa së memine la qenenöje së.

Hna luen maine tro së a ce ngöën la aqane melene la atre kamadra, tre, tro së öne kahape tha ceitune kö memine la aqane mele së. Nene la qenenöjei kamadra na löth la aqane mele së. Enehila itre nekönatr a iji görok menu, pë hë nyipi huliwa nine la itre qenenöj. Musi hë kahaitr, sixa, me kanabis. Ijine faipopo kola hmo hmenu la itre thupetresij me itre nekotrahmany, xa ijin thupene faipopo kola traqa la ngazo koi itre ka ij tui itre loto na hna me humuth la itre xa trejin me së. Ufi sixa menu hë lo itre nekönatr ka co, pë hë imetrötrekeu. Itre tremun a ce ij, thupëtresij me nekötrahmany a ce uf me ce mo. Kola qaja hnei ketre nyima qangöne la hunahmi ne Tingeting kahape asehë amon la itre trjine me eni nene la itre ewekë ka traqa fë qa kuhu hnagejë.

Ame fe lo itre hnëmec tre tru catr macaju kö la itre ka ij hune la itre ka tha ij, easë ön kahape tro menu hë së, ase nyawa löth la aqane mele së hnene la itre ewekë i kamadra. Ame fe la ketre, tre, enehila ame lo itre thin, tre nyapa macajukö lo elo bingo hune la troa thupëne nyawan la itre nekoi angatr, ame pë la pun tru catr hnei « délinquant » me « délinquante ». Kola qajaqaja koi së troa hmekën la mel, pine laka kola nyima sai së hnei kamadra, angatr a mele nyiwa nge ame pë së tre na emoth tun la itre ka xeti he. Itre neko së hna na ekuhu ngojeny, xan a wesipo hnei kanabis, xan kola traqa menu la itre xa mec, xan a i humuth kola ha tun lo itre « film americain ».

Luzi hë la nöje së hnei itre mo ka angazon la aqane mele së. Tro së ce atre kahape ame la itre atre tre ka lolo catre angatr ngo hnei kahaitre pë me itre xa ewekë hna angazon la aqane mele së.

Angetrejine, ijine hila troa anith kowe la itre nekö së la itre mekun ka lolo matre tro angatr elany a mel ngöne la tingeting me ihnim jëne la qene drehu me qene nöje së.

Tru catr palahi la xou troa ne qeje pengöne la itre xa mekun ngo eni palahi a qaja jëne la ipië me metrötr, oleti nge asetihë.

DRAIKOLO Marvin, Qene Drehu me itre ewekë ka fetra qa kuhu hnagejë, 27/07/2016.