Itre trekes ka qeje pengöne la drehu

Ame la trekes hnapan, tre, qathei Hnamiatr Wanir WELEPAN, ka hape "Qëmek".

Ngöne la hnalapa,
Hune la ihnado
Hnei'ö hna cile ngön.
Hamëne pi la qëmeke iö,
La hnei'ö hna hetreny,
Kowe la joxu,
Kowe la qat,
Kowe la föe
Maine nekönat...

Ngöne la qenenöje shë,
Hmitröte la qëmek,
Ke eje a nyi ngönetein
La ite ewekë ka sihngödi
Me ka jui ngöne la ce mel
Ne la ite ate me ite hnanyijoxu.

Ngöne la qenenöje shë,
Ame la qëmek,
Ke hatene madin,
      hatene xou,
      hatene ipië,
      hatene metöt,
      hatene tingeting,
      hatene ihnim,
      hatene tro,
      hatene huliwa,
      hatene tengewekë...

Qëmeke la ki
Nyine fe pi la tengewekë
Ne la ate ne la nöj
Troa kapa la tro
Maine ate ka traqa,
Nge ite u ne la nöj
A denge me goëën
La ite hatene
Me ite tengewekë hna ikep
E hna kapa la qëmeke iö,
Te, tingeting la tro,
Kola kepe'ö hnene la ite ate
Me ihnado me it'ewekë ne la nöj,
Ngo e tha hna kapa kö la qëmeke iö,
E pëkö tengewekë ne ikep,
Te, thelejë, hete ewekë...

E tro eö a qëmek
Nge pate kö la ite nyipi alien
Me ite enyipi ewekëne la qëmek,
Te, the kuci qëmek kö,
Wanga tro la qëmeke iö
A hutrö iö pena ha,
A juetëne la hni'ö
Ka pë enyipicin,
Nge tro ha eate koi'ö la hna ewekë
Kola hape :
             "Eö a qaja me kuca la haa thate"
Nge tro ha ati eje iö ka hape :
            "Faresaio ne sunago",
Ke eö a nyi qëmeke nyine mama,
Eö a nyi waina i at
Ngo pate kö la enyipicin,
Kösë pi lo i "ballon" hna uf,
Kolo hi a cipa cat hnei enyi
Ngo qatikö ca alien,
Nge tro la ite u ne ihnado
Me ite mene ne nöj
A hnyima sai'ö a nyi cako "ka sérieux".